12 сентября 2021

Фәйзи Ғәскәров исемендәге дәүләт академия халыҡ бейеүҙәре ансамбле репертуарын байыта

Яңы миҙгелдә Фәйзи Ғәскәров исемендәге дәүләт академия халыҡ бейеүҙәре ансамбле солистары чечен-ингуштарҙың «Йәштәр», аргентиндарҙың «Гаучо» көтөүселәр бейеүҙәрен тергеҙеп ҡуйырға ниәтләй. Шулай уҡ оло сәхнәгә «Бөркөтостан» да ҡайтарыла. Сығыштарҙы әҙерләүҙә Рәсәйҙең һәм Башҡортостандың халыҡ артисы Дикалу Музакаев ярҙам итә. Дикалу Музакаев, Рәсәйҙең һәм Башҡортостандың халыҡ артисы
Иртәгә ғәскәровсылар «Мәҙәни шәмбе» акцияһы сиктәрендә асыҡ ишектәр көнө уҙғара. Сара иртәнге сәғәт 11-ҙә башлана. Ошонда уҡ ансамблдең оркестры «Музыкаль ҡунаҡхана»ға саҡырасаҡ. Акцияға килеүселәр ансамблдең тарихы, уның әлеге артистары һәм ветерандары менән таныша, ансамбль тураһында фильмдар ҡарай, балет класын күрә ала.

Ҡунаҡтар шулай уҡ бейеүселәрҙең костюмдарын кейеп ҡарап,фотоға төшөү мөмкинлегенә лә эйә була. Ансамбль музейында тамашасыларҙы Башҡортостандың халыҡ артисы, Салауат Юлаев исемендәге дәүләт премияһы лауреаты Риф Ғәбитов менән осрашыу көтә.